Monday, July 23, 2012

مخمس مردود

حلوة عَ وجّا أنوار... ظريفة و دمّاتا خفاف
عَ خصرا زهّر نوّار... و مدّو غصونو للكتاف
**********************************
البين ضلوع سلبتي سلب... و جفني صلب بعيني دموع
بعيني دموع و جفني صلب... سلبتي سلب البين ضلوع
بشفّة و قبلتين و قلب... قلبتي قلب للموضوع
للموضوع قلبتي قلب... بشفتين و قلب و قبلة
و قلبين و قبلة و شفاف

Tuesday, July 17, 2012

وجع الوطن

يا وطني مش عم تمشي... صوت الحق سمعتو سكوت
حلمي من ترابك كمشة... و زبالة عترابك مزتوت
سكّرت عيوني برمشي... و قلت لحالي بدي فوت
بوطني حصِّل قرشي... و عمِّر لولادي لبيوت
فتّت و بلّشت الورشة... و علِقت ببيت العنكبوت
بيمشي شغلي بس إرشي... و بس اطبع اسمي عكروت
قال لازم انفخ كرشي... و صير سياسي يعني حوت
و شعبي جرّو بحلشة... و الأزعر سيبو مفلوت
ما الطائفية مشرشة... بنفوسن متل شروش التوت
و القاهرني اكتر شي... تركتك وطني عالفرشة
و درتلّك ذيني الطرشة... و كان بدي موت بأرضك
هجرتك انت و عم بتموت

Monday, July 16, 2012

عتابا و ميجانا

قالِت حلى الشبان يا بالعرض يا بالطول
لكن انت غيرن بتسحرني فيك كلما بتطل
قلتلها لو اشتقتي اندهيلي يا بو الطل
بطلطل عليكِ الف مرّة بالسنة

Friday, July 13, 2012

زجل

عالعيد عزمتا و شو ذنبي... مساقب عيدي بشهر الصوْم
رفْضِت حرقتلي قلبي... و نزلت فيي عتاب و لوْم
و قال تإستغفر ربّي... و صوم الشهر تلاتين يوم
قلتلّا دخلِك يا حبّي... سمعي بقلبي شو مخبّي
من وقت لِطلعتي بدربي... صايم لا أكل و لا شرب
و لا عيوني بتشوف النوم