Monday, February 10, 2014

بتموني

يللي عليي بتموني،، لمّا قبالي بتكوني
حتّى لو لحظة صعبة،، ترمش شي رمشة عيوني

عم بسكر بمحبّتها،، حتّى بريحة قبّتها
و عيونا اللي عبّتها،، كحلي.. شو بيسكروني

حضني ضمّا لما شافا،، و شالا من لون شفافا
و من لمسة شال كتافا،، بحس شفافا باسوني

وحياتك وحياة ربّك،، حسّي بقلبي اللي حبّك
لو بقدر ادخل قلبِك،، و جوّات قلبك ينسوني

Tuesday, March 5, 2013

عتابا

تلألأ نور من بسمة و عاجا بان،،
و أُعجَب هالقلب فيها عَجباً،،
تمرجل يا هوى بضحكة عجبان،،
كيف بدنا نحكي و نعقدلا لساننا...

قصيدة في عيد الحب

بعيد الحب عم بكتب قصيدة،، غير الكتابة شو بيطلع بإيدي
كتر ما بحب هالحب و جمالو،، الليلة كأنو العيد صار عيدي
بدي الحب ما برضى بدالو،، تا عنّو اكتب و عبّي الجريدة
اللي متلي حب لو قل مالو،، بضلّ يقلّك انا حبّي رصيدي
الحبّو الوطن هيك كرمالو،، شهيد بجنّتو بعيّد شهيدة
و الحب والدو بلهفة انحنالو،، و قلّو رضاك بدّي يا سيدي
و الحب إمّو الي زادت دلالو،، ما بينسى فضل هالإم الفريدة
و يللي صليبو بيطلع قبالو،، بيصلّب محبة الفادي أكيدة
و يللي بيركع يصلّي هلالو،، بيضوي محبّة و إيمان بعقيدة
أما العاشق بالعشق نيّالو،، بِحس حالو عايش دني جديدة
بيبقى لحالو و مَنّو لحالو،، بقلبو وحيدة و مَنّا وحيدة
هيك الحب ما بينقص كمالو،، و قلبي شرب من نبعو لأنو
نبعة الحب عم تجري بوريدي

عتابا

قبل ما تصلّي عقبري بسملي،، لمّا توقفي ابعدي عنّو بس ميلي،،
و بوسي من خدودي بس ميلي،، لو بدّك عقبري ترقصي بس ميلي،،
و من تمّك بعتيلي شي بسمة لي،، تقوم و اغمرك من تحت التراب

Tuesday, September 25, 2012

ما بعد الحب و قبله

تهيمُ قوافلُ أناملي
في تلك الصحراء السمرا
تنغمسُ في رمالِها
و فمي يكسوها تقبيلاً
يبحث عن قطرة خمرا
يتخطى الأرباع الخالية
تهب الريح
يزداد الدفئُ دفئً
و أضيع بين نخلتين
و بين النخلتين واحة
أسقيها من فمي كيلاً
تضجُّ البيداء نشوةً
أشعرٌ غجريٌ هذا
أم ليلٌ أسود قد لاحَ؟
يصرخُني صوتٌ أمميٌ
يا فارس
لا تنسى سلاحَ
ما بعد الجنس و الأرباع الخالية
ثورات طلقات رشقات
مَن رضع الحب من نهدٍ
أخذَ الوطنية لقاحَ

Monday, July 23, 2012

مخمس مردود

حلوة عَ وجّا أنوار... ظريفة و دمّاتا خفاف
عَ خصرا زهّر نوّار... و مدّو غصونو للكتاف
**********************************
البين ضلوع سلبتي سلب... و جفني صلب بعيني دموع
بعيني دموع و جفني صلب... سلبتي سلب البين ضلوع
بشفّة و قبلتين و قلب... قلبتي قلب للموضوع
للموضوع قلبتي قلب... بشفتين و قلب و قبلة
و قلبين و قبلة و شفاف

Tuesday, July 17, 2012

وجع الوطن

يا وطني مش عم تمشي... صوت الحق سمعتو سكوت
حلمي من ترابك كمشة... و زبالة عترابك مزتوت
سكّرت عيوني برمشي... و قلت لحالي بدي فوت
بوطني حصِّل قرشي... و عمِّر لولادي لبيوت
فتّت و بلّشت الورشة... و علِقت ببيت العنكبوت
بيمشي شغلي بس إرشي... و بس اطبع اسمي عكروت
قال لازم انفخ كرشي... و صير سياسي يعني حوت
و شعبي جرّو بحلشة... و الأزعر سيبو مفلوت
ما الطائفية مشرشة... بنفوسن متل شروش التوت
و القاهرني اكتر شي... تركتك وطني عالفرشة
و درتلّك ذيني الطرشة... و كان بدي موت بأرضك
هجرتك انت و عم بتموت